Возбранный Воеводо и Господи, Радосте кающихся рабов Твоих, к Тебе аз, грешный, в покаянии прибегаю. Приими мя, Отче, кающагося, не отрини слез моих и воздыханий сердечных и не презри во умилении Тебе зовущаго:
Милостиве, помилуй мя, падшаго.
Адаму первозданному поревновав аз в преступлении, наруших заповеди Бога моего, душу бо и тело оскверних деяньми лютыми. И с чего начну оплакивати свое скверное житие? Какое же положу начало нынешнему рыданию? Но прииди, окаянная моя душе, с плотию своею, исповедайся Создателю всех и возопий Ему со слезами:
Милостиве, воззри на мя оком Твоим благоутробным и приими мое теплое покаяние.
Милостиве, согреших аз паче всех человек, един аз согреших пред Тобою, но Ты, яко Бог, помилуй создание Твое.
Милостиве, яко блудница, проливаю и аз слезы, помилуй мя по благоснисхождению Твоему.
Милостиве, оскверних аз ризу плоти моея и очерних в себе созданное по образу Твоему и подобию.
Милостиве, помрачих аз душу свою страстными удовольствиями и весь ум соделах прахом.
Милостиве, наг аз лежу от добродетелей и стыждуся.
Милостиве, помилуй мя, падшаго.
Виждь, душе моя, яко конец приближается, близ при дверех Судия есть. Пробудися, размысли о делех своих, яже ты соделала еси, представи их пред очи твоя и пролей капли слез твоих; поведай со дерзновением дела и помышления твоя Христу и во умилении сердца возопий Ему: Аллилуиа.
Разумех аз, Спасителю мой, яко несть в жизни ни греха, ни деяния, ни зла, в коем аз не согреших бы умом, словом и произволением паче всех человек. Совесть обличает мя, совесть осуждает мя в злых делех моих. Но Судие, Избавителю мой и Ведче, пощади, избави и спаси мя, раба Твоего, Тебе вопиющаго:
Милостиве, согреших, согреших, продав душу свою греховным навыкам, якоже братия Иосифа.
Милостиве, якоже Каин, и аз принесох Ти жертву порочную: деяния скверная и житие непотребное, темже и осудихся.
Милостиве, от юности заповеди Твоя преступив, в унынии житие преидох, спаси мя милостию Твоею.
Милостиве, яко блудный сын, расточих и аз богатство свое в блуде и гладом душевным истаяваю, темже и вопию Ти: Щедрый, напитай мою душу благодатию Твоею.
Милостиве, весь аз уязвихся помышлениями моими, весь исполнихся ран, яко впадый в разбойники, но Ты, пришед, исцели мя.
Милостиве, внемли стенаниям души моея, приими слезы очей моих и очисти мя, кающагося.
Милостиве, помилуй мя, падшаго.
Силою Твоею, Спасе, изгнан бысть достойно Адам из Едема, яко не сохранив едину Твою заповедь; и сей седяше прямо рая и, свою наготу горько рыдая, вопияше: «Увы мне раю, раю мой прекрасный!» Аз же что постражду, Господи мой и Боже, отметая всегда животворная Твоя словеса? Но даждь ми время, да плачуся дел моих горько и Тебе воспою: Аллилуиа.
Имеяй во уме множество содеянных мною лютых, трепещу окаянный. И что убо сотворю, егда приидет Господь со тьмами ангел судити вселенней? Увы мне, увы! Боже отцев, прежде даже не затвориши ми дверь Твоего милосердия, к Тебе прибегаю, Щедре, и вкупе с Давидом вопию:
Милостиве, во гресех рожден есмь аз и приложих к язвам своим иныя раны, но помилуй мя, Отцев Боже.
Милостиве, яко Давид согреших Тебе и аз: ураних бо душу свою стрелою прелюбодейства, но, якоже и он, вопию Ти: помилуй мя по милости Твоей.
Милостиве, возбуди ум мой ко обращению, приими мя, кающагося, умилосердися к взывающему: согреших Ти, спаси.
Милостиве, ни странника, ни путника не введох аз под кров свой, отринув благое произволение самаритянки, темже и рыдаю: не лиши мя Твоего чертога.
Милостиве, сребролюбием одержимь есмь аз, темже, яко Гиезий, и осуждаюся.
Милостиве, произволением бых убийца совести душевней, вооружився на ню лукавыми моими деяньми.
Милостиве, помилуй мя, падшаго.
Буря грехов обыде мя, и кто прострет ми руку помощи, аще не Ты, возсиявый от Девы Иисусе. Спаси мя, вопию Ти, спаси, яко спасл еси Петра утопавшаго; да не потопит мене буря страстей. Приведи мя к пристанищу безмятежному, да с любовию воспою Ти: Аллилуиа.
Слыша, яко одождив иногда Господь огнь, попали землю Содомскую, увы! - вопию,- душе, востани! - Да не опалит мя огнь геенский. Бежи от запаления, бежи от горящаго Содома, бежи от Божественнаго пламене, на горе спасайся, якоже Лот, взывая к Богу:
Милостиве, аще и согреших, но вем, яко Человеколюбец еси, наказуеши милостиво, и милосердствуеши тепле, и поспешаеши, яко Отец, призывая блуднаго.
Милостиве, ризу скверную сотка ми грех во обличение моих самовольных страстей, обнажив мя первыя боготканныя одежды.
Милостиве, прилепихся аз к вещем земным и тяжким бременем обложен есмь.
Милостиве, украсих аз кумира плоти моея одеянием скверных помыслов, презрев внутреннюю Богообразную скинию.
Милостиве, погребох страстьми перваго образа красоту, юже, яко некогда драхму, взыскав, обрящи.
Милостиве, согреших, взываю Ти, яко блудница, един аз согреших пред Тобою, но приими, яко оныя, и моя слезы.
Милостиве, помилуй мя, падшаго.
Боготочную кровь Ты, Спасе, излиял еси на Кресте, да омыеши мя; дух предал еси, да мя приведеши Твоему Родителю; Едем затворенный отверзеся, вся тварь и вси языцы спасени покланяются Тебе и воспевают присно: Аллилуиа.
Видите, видите, яко Аз есмь Бог! - внемли, душе моя, Господа вопиюща, удалися прежняго греха и убойся Господа, яко Праведнаго Судии и Бога. Обратися, покайся, открый сокровенная, припади к Нему, яко блудный сын, со слезами и, бия в перси, глаголи Богу, вся ведущему:
Милостиве, изранен и изъязвлен есмь аз: се стрелы врага пронзоша душу и тело, темже и прибегох к Тебе со слезами.
Милостиве, яко мытарь, вопию Ти: очисти, очисти мя, никтоже бо сущих из Адама, якоже аз согреших Тебе.
Милостиве, сними тяжкое бремя грехов моих и остави ми прегрешения.
Милостиве, вольная моя и невольная согрешения, явная и тайная, ведомая и неведомая, простив, спаси мя.
Милостиве, буря страстей потопляет мя, и несть ми спасения, но простри и мне Твою руку, яко Петрови.
Милостиве, не затвори двери милосердия Твоего в День Судный, но отверзи я кающемуся Тебе горце.
Милостиве, помилуй мя, падшаго.
Пустыннолюбная горлица, глас Вопиющаго, Христов светильник Предтеча всем возгласи людем: «Покайтеся и предочиститеся»; и Иудея вся и Самария, слышавше, течаху и исповедаху грехи своя. Тецы убо и ты, душе моя, к Источнику жизни, да не увязнеши в беззаконныя сети, облобызай убо покаяние и воспой Христу: Аллилуиа.
Вонми, небо, и возглаголю, земле, внушай глас, кающийся к Богу. Кто бо от человек согреши тако, якоже аз: ум изранен, болезнует тело, немоществует дух, умножишася струпы. Врачу Благодатный, прежде даже до конца не погибну, спаси мя, тако Тебе вопиющаго:
Милостиве, Ты еси Бог, испытуяй сердца, истязуяй намерения и изобличаяй дела, попали терние грехов моих и яви мя чиста пред Тобою.
Милостиве, Ты еси Пастырь добрый, взыщи мене, яко овцу, в тернии грехов погибающаго.
Милостиве, Ты еси мой Создатель, Тобою, Спасе, оправдаюся.
Милостиве, Ты еси жизни Источник, источи душе моей жизнь, оживотвори ю, дондеже не постиже мя кончина.
Милостиве, подобник бых иже при Нои грехи сотворшим, темже, якоже оныя, погружаюся в водах потопа.
Милостиве, не прикрых аз ближняго срамоты, совесть оскверних наглым языковещанием, уподобися сим Хаму отцеубийце.
Милостиве, помилуй мя, падшаго.
Хотя всем спастися и в разум истины приити, Ты, Сыне Божий, снизшел еси на землю, вочеловечився и призвав к покаянию разбойники и блудницы, и отверзл еси двери Царствия всем кающимся. Покаяния отверзи и мне двери, Жизнодавче, к Тебе бо утренюю и Тебе вопию: Аллилуиа.
Дивное покаяние Богу принесоша Ниневитяне, егда Иона пророк возгласи им о погибели их, облекшеся во вретища и пеплом главы своя посыпающе, плач велий творяще, глаголюще: «Да отвратит Господь гнев Свой праведный». Восплачи убо и ты, душе моя, возстени к Богу, яко Ниневитяне, и тако глаголи:
Милостиве, Измаил изгнан бысть, яко порождение рабыни, да не постигнет мя сие за любострастие.
Милостиве, волею раболепствовах аз греху и, якоже Агарь, породих новаго Измаила - дерзость.
Милостиве, не отрини моления воспевающих Тя и просящим с верою прощение даруй.
Милостиве, помилуй, вопию Ти, помилуй, егда приидеши со ангелами воздати комуждо по достоянию деяний.
Милостиве, не презри создания Своего, аще и согреших паче всех человек. Ты - Господь вселенныя, аз же персть, и в Твоей власти отпустити грехи моя.
Милостиве, аще и оскверних душу и тело, но Ты, Спасителю мой, очисти, омый, соделай мя белее снега.
Милостиве, помилуй мя, падшаго.
Странна себе сотворих пред Тобою, Иисусе, предпочет кладязи хананейских помыслов паче Камене Твоего с источником премудрости и свиная мяса паче Пищи Небесныя. Темже, яко блудный сын, гладом истаяваю, не разумея пети: Аллилуиа.
Весь аз, уязвихся помышленьми моими и исполнихся ран, яко впадый в разбойники, и, видев мя, священник мимоиде и левит такожде, узрев лежаща в беде, презре. Но Ты Сам, Христе, возлей на мя масло и вино, тако Тебе вопиющаго:
Милостиве, да ,будет ми купелию очищения и питием отрады Кровь Твоя и вода, истекшая из ребр Твоих, и оживотвори мя Собою.
Милостиве, яко фарисей, надмеваюся и, якоже он, дерзость пред Тобой сотворяю, но потреби во мне грех и сердце смиренно ми даруй.
Милостиве, вем, яко согреших пред Тобою, но кающася аз - приими мя, вопиюща - возстави, да не буду стяжанием и снедию врага, Сам умилосердися надо мною.
Милостиве, не послушах аз гласа Твоего, ни Писанию Твоему покорихся, темже и наг предстою пред Тобою.
Милостиве, нощь греха моего бысть ми тьмою и глубоким мраком, но Ты, Спасителю мой, сыном дне мя соделай.
Милостиве, увы мне, яко ум оскверних нечистотою, но молю благость Твою, омый мя в купели слез моих и, яко снег, убели одежду плоти моея.
Милостиве, помилуй мя, падшаго.
Ветхаго Завета вся привожду ти, душе моя, к подобию. Подражай праведных боголюбивая деяния, избегни же паки лукавых грехов, да пощадит тя Христос в День Судный и да сподобишися воспети Ему со всеми святыми: Аллилуиа.
Вития многовещанныя недоумевают, киими словесы побуждати мя к покаянию: ожесточися бо сердце во мне, и не имам аз ниже слез, ниже плача. Милостиве, Щедре, коснися сердца моего благостию Своею и Духом Владычним утверди мя, тучу слез пошли ми, рабу Твоему, Тебе молящемуся:
Милостиве, яко кровоточивая, прибегох к Тебе, касаяся воскрилий риз Твоих, да речеши и мне, якоже оной: «Вера твоя спасе тя».
Милостиве, источи ми струи живительныя из пречистых жил Твоих, напой мя, яко самаряныню, да не вжаждуся во век.
Милостиве, да будут Силоамом слезы моя мне, да омыю ими зеницы души моея и умом узрю Свет Твой присносущный.
Милостиве, приношу Тебе слезы очей моих и глубокие вздохи. Сердце вопиет во мне: «Боже, согреших пред Тобою; умилосердися, прости».
Милостиве, яко Дафан и Авирон, удалися от Тебе душа моя, темже и зову Ти: «Пощади, да не поглотит мя земля, якоже оных».
Милостиве, волны грехов моих покрыли мя суть, якоже всадники египетския Чермное море, но воззови мя из ада преисподняго и избави от тления живот мой.
Милостиве, помилуй мя, падшаго.
Спастися хотяй Божественнаго пламене, бежа Лот из Содома, якоже повеле ему Господь. Душе моя, аще и ты хощеши спастися, праведному подражай, бежи от пламени греха, бежи от пожара, вожделением безумным возжженнаго, не буди столп сланый, возвратившися вспять, образ да устрашит тя содомский. Богу воспой: Аллилуиа.
Царю Святый, время жития моего мало и исполнено болезней и лукавства, но в покаянии мя приими и в разум призови, да не буду стяжанием, ни брашном чуждему, Сам умилосердися над вопиющим:
Милостиве, Ты еси пристанище необуреваемое, ускори и изми мя из глубины греха, да не отчаяния поглотит мя огнь.
Милостиве, аз есмь драхма погибшая, взыщи мя, возжжи Свой свет и обрящи Свой образ.
Милостиве, Давид убо сугубо согреши, обаче плакася горько, аз же паче сего зло содеяв, плодов не принесох Ти покаяния.
Милостиве, Соломон, некогда премудрый, возлюби распутных жен и от Бога отступи, сему же и аз подражах в мыслех постыдным произволением.
Милостиве, увы мне! В мерзостех сравнихся аз с Ахавом, душу бо содеяв свою виталищем плотских нечистот и сосудом гнусных страстей.
Милостиве, очернися вся доброта во мне, и от страстей светильник угасе, но умилосердися и воздаждь ми, якоже поет Давид, радование.
Милостиве, помилуй мя, падшаго.
Песнь чудную преднаписа Ти иногда Давид, егоже деяние обличает, еже содея, да ты, душе моя, покаешися и возстенеши, оставиши злая дела своя и, якоже он, возгласиши: «Помилуй мя, Тебе бо Единому согреших, всех Богу, Сам очисти мя по милости Твоей», - и да возможеши чистым сердцем пети Ему: Аллилуиа.
Светодавче Господи, ниспосли свет Твой и просвети сердце мое, душу мою от всякаго греха очисти, к Тебе бо, яко Иона, вопию, сице глаголя:
Милостиве, исчезают дни мои, яко сон, темже и плачу, яко Езекия на ложи, продли мою жизнь и да омыю своя согрешения.
Милостиве, яко разбойник, вопию: помяни мя! Яко Петр, плачу горько, яко мытарь, взываю: прости мя, Спасителю.
Милостиве, яко блудница, проливаю слезы, приими мое рыдание, якоже некогда жены хананейския.
Милостиве, Ты еси един Врач, уврачуй язвы души моея, возложи на ню пластырь, возлей масло и вино и даруй ми умиление и слезы.
Милостиве, яко кровоточивая, прикасаюся к воскрилиям риз Твоих и плачу, яко Марфа и Мария над Лазарем.
Милостиве, изливаю слезы моя Тебе, яко сосуд мира на главу, приношу моление и прошу прощение ми даровати.
Милостиве, помилуй мя, падшаго.
Благодать Твою не отыми от мене, Благий Иисусе, аще бо и согреших паче всех человек, Ты еси Бог Милосердный, не хощеши смерти грешника, прощаеши кающихся и призываеши заблуждших. Освяти мя благодатию Своею и Дух правый обнови во утробе моей. Тебе бо в покаянии зову: Аллилуиа.
Плачу и рыдаю, Господи, о содеянных мною злых и благость Твою молю: плодов достойных покаяния не истяжи от мене, ибо крепость моя во мне оскуде: сердце ми даруй присно сокрушенное, нищету же духовную, да сия Тебе принесу, яко приятную жертву. Спаси мя, Тебе вопиющаго:
Милостиве, виждь страх мой, виждь сокрушение души моея и прощение ми даруй.
Милостиве, Ты еси Судия мой и Бог, да внемлет сему душа моя и да отступит от всякаго греха, якоже Ты повелеваеши.
Милостиве, не вниди со мною в суд, не истязуй моя деяния, но презри, яко Щедр, прегрешения моя и спаси мя, Всесильне.
Милостиве, Тебе припадаю, согреших Ти, очисти, возми бремя от мене тяжкое греховное и, яко Благоутробен, даждь ми слезы умиления.
Милостиве, поведах Ти грехи, яже содеях, и души и тела моего язвы, яже внутрь убийственнии помыслы разбойнически на мя возложиша.
Милостиве, повержена мя пред враты Твоими, яко непотребнаго, не низведи мене во ад, но прежде конца даждь ми оставление прегрешений.
Милостиве, помилуй мя, падшаго.
О Преблагий и Всещедрый Иисусе, вся тайная сердца моего и вся, яже содеях от юности моея даже до дне сего, исповедах Ти, Судии моему. Виждь стенание мое, виждь скорбь мою и вонми суду моему ныне, и Сам мя помилуй, яко Благоутробен, Тебе вопиющаго: Аллилуиа.
Этот кондак читается трижды, затем 1-й икос «Адаму первозданному…» и 1-й кондак «Возбранный Воеводо…».
Господи, Господи, се предстою пред Тобою, яко блудный сын, исповедуя грехи своя благости Твоей. Согреших Ти, Спаситель мой, согреших. От юности бо моея грех содеях и оскверних душу и тело деяньми лютыми. Согреших Ти, якоже праотцы наши Адам и Ева, преслушав заповеди Твоя; согреших, якоже Каин и яко вси людие грешницы Ветхаго и Новаго Завета. Ум очерних помыслами неподобными, сердце исполних нечистотою и всяким греховным чувством, волю ослабих леностию и склонностию ко греху. Весь обложен есмь язвами греховными, якоже впадший в разбойники; вси раны души моея источают гной. Кто исцелит мя? Или кто возставит мя из глубины греховныя жизни, аще не Ты, Врачу Благодатный? Сего ради к Тебе прибегох, Царю мой и Боже мой, слезно моляся. Уврачуй и исцели мя. Ум мой очисти от непотребных помыслов, сердце свободи от греховныя нечистоты, да возмогу чистым сердцем и умом славити Тя, Создателя моего и Бога. Волю мою укрепи на дела благая, во еже творити ми точию угодная Тебе и достойная Твоея Святыни. Прости ми всякое согрешение, вольное и невольное, и вся, яже в ведении и в неведении содеянное мною. Ты еси Сама Благость и Сама Любовь и имаши власть отпущати грехи, и Тебе славу возсылаем со Отцем и Святым Духом ныне, и присно, и во веки веков. Аминь.
]]>Ирмос: Помощник и Покровитель бысть мне во спасение; Сей мой Бог, и прославлю Его, Бог отца моего, и вознесу Его: славно бо прославися (2).
Припев: Помилуй мя, Боже, помилуй мя.
Откуду начну плакати окаяннаго моего жития деяний? Кое ли положу начало, Христе, нынешнему рыданию? Но, яко Благоутробен, даждь ми прегрешений оставление.
Гряди, окаянная душе, с плотию твоею, Зиждителю всех исповеждься и останися прочее прежняго безсловесия, и принеси Богу в покаянии слезы.
Первозданнаго Адама преступлению поревновав, познах себе обнажена от Бога, и присносущнаго Царствия и сладости, грех ради моих.
Увы мне, окаянная душе, что уподобилася еси первей Еве, видела бо еси зле, и уязвилася еси горце, и коснулася еси древа, и вкусила еси дерзостно безсловесныя снеди.
Вместо Евы чувственныя, мысленная ми бысть Ева, во плоти страстный помысл, показуяй сладкая и вкушаяй присно горькаго напоения.
Достойно из Едема изгнан бысть, яко не сохранив едину Твою, Спасе, заповедь Адам; аз же что постражду, отметая всегда животная Твоя словеса?
Каиново прешед убийство, произволением бых убийца совести душевней, оживив плоть и воевав на ню лукавыми моими деяньми.
Авелеве, Иисусе, не уподобихся правде, дара Тебе приятна не принесох когда, ни деяния божественна, ни жертвы чистыя, ни жития непорочнаго.
Яко Каин и мы, душе окаянная, всех Содетелю деяния скверная, и жертву порочную, и непотребное житие принесохом вкупе; темже и осудихомся.
Брение Здатель живосоздав, вложил еси мне плоть и кости, и дыхание, и жизнь; но, о Творче мой, Избавителю мой и Судие, кающася приими мя.
Извещаю Ти, Спасе, грехи, яже содеях, и души и тела моего язвы, яже внутрь убийственнии помыслы разбойнически на мя возложиша.
Аще и согреших, Спасе, но вем, яко Человеколюбец еси, наказуеши милостивно и милосердствуеши тепле: слезяща зриши и притекаеши, яко отец, призывая блуднаго.
Повержена мя, Спасе, пред враты Твоими, поне на старость не отрини мене во ад тща; но прежде конца, яко Человеколюбец, даждь ми прегрешений оставление.
В разбойники впадый аз есмь помышленьми моими, весь от них уязвихся ныне и исполнихся ран; но Сам ми представ, Христе Спасе, исцели.
Священник мя предвидев мимо иде, и левит видя в лютых нага презре; но из Марии возсиявый Иисусе, Ты представ ущедри мя.
Агнче Божий, вземляй грехи всех, возми бремя от мене тяжкое греховное и, яко Благоутробен, даждь ми слезы умиления.
Покаяния время, прихожду Ти, Создателю моему, возми бремя от мене тяжкое греховное и, яко Благоутробен, даждь ми слезы умиления.
Не возгнушайся мене, Спасе, не отрини от Твоего лица, возми бремя от мене тяжкое греховное и, яко Благоутробен, даждь мне грехопадений оставление.
Вольная, Спасе, и невольная прегрешения моя, явленная и сокровенная, и ведомая и неведомая, вся простив, яко Бог, очисти и спаси мя.
От юности, Христе, заповеди Твоя преступих, всестрастно небрегий, унынием преидох житие. Темже зову Ти, Спасе: поне на конец спаси мя.
Богатство мое, Спасе, изнурив в блуде, пуст есмь плодов благочестивых, алчен же зову: Отче щедрот, предварив Ты мя ущедри.
Тебе припадаю, Иисусе, согреших Ти, очисти мя, возми бремя от мене тяжкое греховное и, яко Благоутробен, даждь ми слезы умиления.
Не вниди со мною в суд, нося моя деяния, словеса изыскуя, и исправляя стремления; но в щедротах Твоих презирая моя лютая, спаси мя, Всесильне.
Припев: Преподобная мати Марие, моли Бога о нас.
Ты ми даждь светозарную благодать от Божественнаго свыше промышления, избежати страстей омрачения, и пети усердно твоего, Марие, жития красная исправления.
Припев: Преподобная мати Марие, моли Бога о нас.
Приклоншися Христовым Божественным законом, к сему приступила еси, сладостей неудержимая стремления оставивши, и всякую добродетель всеблагоговейно, яко едину исправила еси.
Припев: Преподобне отче Андрее, моли Бога о нас.
Молитвами твоими нас, Андрее, избави страстей безчестных, и Царствия ныне Христова общники, верою и любовию воспевающия тя, славне, покажи, молимся.
Слава: Пресущная Троице, во Единице покланяемая, возми бремя от мене тяжкое греховное и, яко Благоутробна, даждь ми слезы умиления.
И ныне: Богородице, надежде и предстательство Тебе поющих, возми бремя от мене тяжкое греховное и, яко Владычица Чистая, кающася приими мя.
Ирмос: Вонми, Небо, и возглаголю, и воспою Христа, от Девы плотию пришедшаго (2).
Вонми, Небо, и возглаголю: земле, внушай глас, кающийся к Богу и воспевающий Его.
Вонми ми, Боже, Спасе мой, милостивным Твоим оком, и приими мое теплое исповедание.
Согреших паче всех человек, един согреших Тебе; но ущедри яко Бог, Спасе, творение Твое.
Буря мя злых обдержит, Благоутробне Господи; но яко Петру и мне руку простри.
Слезы блудницы, Щедре, и аз предлагаю: очисти мя, Спасе, благоутробием Твоим.
Омрачих душевную красоту страстей сластьми, и всячески весь ум персть сотворих.
Раздрах ныне одежду мою первую, юже ми изтка Зиждитель изначала, и оттуду лежу наг.
Облекохся в раздранную ризу, юже изтка ми змий советом, и стыждуся.
Воззрех на садовную красоту, и прельстихся умом; и оттуду лежу наг и срамляюся.
Делаша на хребте моем вси начальницы страстей, продолжающе на мя беззаконие их.
Погубих первозданную доброту и благолепие мое, и ныне лежу наг и стыждуся.
Сшиваше кожныя ризы грех мне, обнаживый мя первыя боготканныя одежды.
Обложен есмь одеянием студа, якоже листвием смоковным, во обличение моих самовластных страстей.
Одеяхся в срамную ризу, и окровавленную студно, течением страстнаго и любосластнаго живота.
Оскверних плоти моея ризу, и окалях еже по образу, Спасе, и по подобию.
Впадох в страстную пагубу и в вещественную тлю, и оттоле до ныне враг мне досаждает.
Любовещное и любоименное житие невоздержанием, Спасе, предпочет, ныне тяжким бременем обложен есмь.
Украсих плотский образ скверных помышлений различным обложением и осуждаюся.
Внешним прилежно благоукрашением единем попекохся, внутреннюю презрев богообразную скинию.
Вообразив моих страстей безобразие, любосластными стремленьми погубих ума красоту.
Погребох перваго образа доброту, Спасе, страстьми, юже, яко иногда драхму, взыскав, обрящи.
Согреших, якоже блудница вопию Ти: един согреших Тебе, яко миро, приими, Спасе, и моя слезы.
Поползохся яко Давид блудно, и осквернихся; но омый и мене, Спасе, слезами.
Очисти, якоже мытарь, вопию Ти, Спасе, очисти мя; никтоже бо сущих из Адама, якоже аз согреших Тебе.
Ни слез, ниже покаяния имам, ниже умиления; Сам ми сия, Спасе, яко Бог, даруй.
Дверь Твою не затвори мне тогда, Господи, Господи; но отверзи ми сию, кающемуся Тебе.
Человеколюбче, хотяй всем спастися, Ты воззови мя, и приими, яко Благ, кающагося.
Внуши воздыхания души моея, и очию моею приими капли, Спасе, и спаси мя.
Припев: Пресвятая Богородице, спаси нас.
Пречистая Богородице Дево, Едина Всепетая, моли прилежно, во еже спастися нам.
Ирмос: Видите, видите, яко Аз есмь Бог, манну одождивый и воду из камене источивый древле в пустыни людем Моим, десницею единою и крепостию Моею.
Видите, видите, яко Аз есмь Бог; внушай, душе моя, Господа вопиюща, и удалися прежняго греха, и бойся яко неумытнаго, и яко Судии и Бога.
Кому уподобилася еси, многогрешная душе? Токмо первому Каину и Ламеху оному, каменовавшая тело злодействы и убившая ум безсловесными стремленьми.
Вся прежде закона претекши, о душе, Сифу не уподобилася еси, ни Еноса подражала еси, ни Еноха преложением, ни Ноя; но явилася еси убога праведных жизни.
Едина отверзла еси хляби гнева Бога Твоего, душе моя, и потопила еси всю, якоже землю плоть, и деяния и житие, и пребыла еси вне спасительнаго ковчега.
Мужа убих, глаголет, в язву мне, и юношу в струп, Ламех рыдая вопияше; ты же не трепещеши, о душе моя, окалявши плоть, и ум осквернивши.
О како поревновах Ламеху, первому убийце, душу яко мужа, ум яко юношу, яко брата же моего тело убив, яко Каин убийца, любосластными стремленьми.
Столп умудрила еси создати, о душе, и утверждение водрузити твоими похотьми; аще не бы Зиждитель удержал советы твоя, и низвергл на землю ухищрения твоя.
Уязвихся, уранихся, се стрелы вражия, уязвившия мою душу и тело; се струпы гноения, омрачения вопиют, раны самовольных моих страстей.
Одожди Господь от Господа огнь иногда, на беззаконие гневающее, сожег содомляны; ты же огнь вжегла еси геенский, в немже имаши, о душе, сожещися.
Разумейте и видите, яко Аз есмь Бог, испытаяй сердца и умучаяй мысли, обличаяй деяния, и попаляяй грехи, и судяй сиру, и смирену, и нищу.
Припев: Преподобная мати Марие, моли Бога о нас.
Простерла еси руце твои к щедрому Богу, Марие, в бездне зол погружаемая; и якоже Петру человеколюбно руку Божественную простре, твое обращение всячески иский.
Припев: Преподобная мати Марие, моли Бога о нас.
Всем усердием и любовию притекла еси Христу, первый греха путь отвращши, и в пустынях непроходимых питающися, и Того чисте совершающи Божественныя заповеди.
Припев: Преподобне отче Андрее, моли Бога о нас.
Видим, видим человеколюбие, о душе, Бога и Владыки; сего ради прежде конца тому со слезами припадем вопиюще: Андрея молитвами, Спасе, помилуй нас.
Слава: Безначальная, несозданная Троице, нераздельная Единице, кающася мя приими, согрешивша спаси: Твое есмь создание, не презри, но пощади и избави огненнаго мя осуждения.
И ныне: Пречистая Владычице, Богородительнице, надеждо к Тебе притекающих, и пристанище сущих в бури, Милостиваго и Создателя и Сына Твоего умилостиви и мне молитвами Твоими.
Ирмос: На недвижимом, Христе, камени заповедей Твоих утверди мое помышление (2).
Огнь от Господа иногда Господь одождив, землю Содомскую прежде попали.
На горе спасайся, душе, якоже Лот оный, и в Сигор угонзай.
Бегай запаления, о душе, бегай содомскаго горения, бегай тления Божественнаго пламене.
Исповедаюся Тебе, Спасе, согреших, согреших Ти; но ослаби, остави ми, яко Благоутробен.
Согреших Тебе един аз, согреших паче всех, Христе Спасе, да не презриши мене.
Ты еси Пастырь добрый, взыщи мене, агнца, и заблуждшаго да не презриши мене.
Ты еси сладкий Иисусе, Ты еси Создателю мой: в Тебе, Спасе, оправдаюся.
Припев: Пресвятая Троице, Боже наш, слава Тебе.
О Троице Единице Боже, спаси нас от прелести, и искушений, и обстояний.
Припев: Пресвятая Богородице, спаси нас.
Радуйся, Богоприятная утробо, радуйся, престоле Господень, радуйся, Мати Жизни нашея.
Ирмос: Утверди, Господи, на камени заповедей Твоих подвигшееся сердце мое, яко Един Свят еси и Господь.
Источник живота стяжах Тебе, смерти Низложителя, и вопию Ти от сердца моего прежде конца: согреших, очисти и спаси мя.
При Нои, Спасе, блудствовавшия подражах, онех наследствовах осуждение в потопе погружения.
Согреших, Господи, согреших Тебе, очисти мя; несть бо иже кто согреши в человецех, егоже не превзыдох прегрешеньми.
Хама онаго, душе, отцеубийца подражавши, срама не покрыла еси искренняго, вспять зря возвратившися.
Благословения Симова не наследовала еси, душе окаянная, ни пространное одержание, якоже Иафеф, имела еси на земли оставления.
От земли Харран, изыди от греха, душе моя, гряди в землю, точащую присноживотное нетление, еже Авраам наследствова.
Авраама слышала еси, душе моя, древле оставльша землю отечества, и бывша пришельца; сего произволению подражай.
У дуба Мамврийскаго учредив патриарх Ангелы, наследствова по старости обетования ловитву.
Исаака, окаянная душе моя, разумевши новую жертву, тайно всесожженную Господеви, подражай его произволению.
Исмаила слышала еси, трезвися, душе моя, изгнана, яко рабынино отрождение; виждь, да не како подобно что постраждеши ласкосердствующи.
Агаре древле, душе, Египтяныне уподобилася еси, поработившися произволением, и рождши новаго Исмаила, презорство.
Иаковлю лествицу разумела еси, душе моя, являемую от земли к Небесем; почто не имела еси восхода тверда, благочестия?
Священника Божия и царя уединена, Христово подобие в мире жития, в человецех подражай.
Не буди столп сланый, душе, возвратившися вспять; образ да устрашит тя содомский, горе в Сигор спасайся.
Запаления, якоже Лот, бегай, душе моя, греха; бегай Содомы и Гоморры, бегай пламене всякаго безсловеснаго желания.
Помилуй, Господи, помилуй мя, вопию Ти, егда приидеши со ангелы Твоими воздати всем по достоянию деяний.
Моления, Владыко, Тебе поющих не отвержи; но ущедри, Человеколюбче, и подаждь верою просящим оставление.
Припев: Преподобная мати Марие, моли Бога о нас.
Содержим есмь бурею и треволнением согрешений; но сама мя, мати, ныне спаси и к пристанищу божественнаго покаяния возведи.
Припев: Преподобная мати Марие, моли Бога о нас.
Рабское моление и ныне, преподобная, принесши ко Благоутробней молитвами твоими Богородице, отверзи ми божественныя входы.
Припев: Преподобне отче Андрее, моли Бога о нас.
Твоими молитвами даруй и мне оставление долгов, о Андрее, Критский председателю, покаяния бо ты таинник преизрядный.
Слава: Троице простая, несозданная, Безначальное естество, в Троице певаемая Ипостасей, спаси ны, верою покланяющияся державе Твоей.
И ныне: От Отца безлетна Сына в лето, Богородительнице, неискусомужно родила еси, странное чудо, пребывши Дева доящи.
Ирмос: Утверди, Господи, на камени заповедей Твоих подвигшееся сердце мое, яко Един Свят еси и Господь.
Светила богозрачная, Спасовы апостоли, просветите нас во тьме жития, яко да во дни ныне благообразно ходим, светом воздержания нощных страстей отбегающе, и светлыя страсти Христовы узрим, радующеся.
Апостольская двоенадесятице Богоизбранная, мольбу Христу ныне принеси, постное поприще всем прейти, совершающим во умилении молитвы, творящим усердно добродетели, яко да сице предварим видети Христа Бога славное Воскресение, славу и хвалу приносяще.
Непостижимаго Бога, Сына и Слово, несказанно паче ума из Тебе рождшееся, моли, Богородице, со апостолы, мир вселенней чистый подати, и согрешений дати нам прежде конца прощение, и Царствия Небеснаго крайния ради благости сподобити рабы Твоя.
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Припев: Святии апостоли, молите Бога о нас.
Воздержанием поживше, просвещеннии Христовы апостоли, воздержания время нам ходатайствы Божественными утишают.
Припев: Святии апостоли, молите Бога о нас.
Двоенадесятострунный орган песнь воспе спасительную, учеников лик Божественный, лукавая возмущая гласования.
Припев: Святии апостоли, молите Бога о нас.
Одождением духовным всю подсолнечную напоисте, сушу отгнавше многобожия, всеблаженнии.
Припев: Пресвятая Богородице, спаси нас.
Смирившася спаси мя, высокомудренно пожившаго, рождшая Вознесшаго смиренное естество, Дево Всечистая.
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Припев: Святии апостоли, молите Бога о нас.
Апостольское всечестное ликостояние, Зиждителя всех молящее, проси помиловати ны, восхваляющия тя.
Припев: Святии апостоли, молите Бога о нас.
Яко делателе суще, Христовы апостоли, во всем мире Божественным словом возделавшии, приносите плоды Ему всегда.
Припев: Святии апостоли, молите Бога о нас.
Виноград бысте Христов воистину возлюбленный, вино бо духовное источисте миру, апостоли.
Припев: Пресвятая Троице, Боже наш, слава Тебе.
Преначальная, сообразная, всесильнейшая Троице Святая, Отче, Слове и Душе Святый, Боже, Свете и Животе, сохрани стадо Твое.
Припев: Пресвятая Богородице, спаси нас.
Радуйся, Престоле огнезрачный, радуйся, Светильниче свещеносный, радуйся, Горо освящения, Ковчеже Жизни, Святых Святая сене.
Ирмос: Услыша пророк пришествие Твое, Господи, и убояся, яко хощеши от Девы родитися, и человеком явитися, и глаголаше: услышах слух Твой и убояхся, слава силе Твоей, Господи (2).
Дел Твоих да не презриши, создания Твоего да не оставиши, Правосуде, аще и един согреших, яко человек, паче всякаго человека, Человеколюбче, но имаши, яко Господь всех, власть оставляти грехи.
Приближается, душе, конец, приближается, и нерадиши, ни готовишися; время сокращается, востани, близ при дверех Судия есть. Яко соние, яко цвет, время жития течет, что всуе мятемся?
Воспряни, о душе моя! Деяния твоя яже соделала еси помышляй, и сия пред лице твое принеси, и капли испусти слез твоих; рцы со дерзновением деяния и помышления Христу, и оправдайся.
Не бысть в житии греха, ни деяния, ни злобы, еяже аз, Спасе, не согреших, умом и словом, и произволением, и предложением, и мыслию, и деянием согрешив, яко ин никтоже когда.
Отсюду и осужден бых, отсюду препрен бых аз окаянный от своея совести, еяже ничтоже в мире нужнейше; Судие, Избавителю мой и Ведче, пощади и избави, и спаси мя, раба Твоего.
Лествица, юже виде древле великий в патриарсех, указание есть, душе моя, деятельнаго восхождения, разумнаго возшествия; аще хощеши убо деянием, и разумом, и зрением пожити, обновися.
Зной дневный претерпе лишения ради патриарх, и мраз ночный понесе, на всяк день снабдения творя, пасый, труждаяйся, работаяй, да две жене сочетает.
Жены ми две разумей, деяние же и разум в зрении: Лию убо деяние, яко многочадную, Рахиль же разум, яко многотрудную; ибо кроме трудов, ни деяние, ни зрение, душе, исправится.
Бди, о душе моя, изрядствуй, якоже древле великий в патриарсех, да стяжеши деяние с разумом, да будеши ум зряй Бога, и достигнеши незаходящий мрак в видении, и будеши великий купец.
Дванадесять патриархов, великий в патриарсех детотворив, тайно утверди тебе лествицу деятельнаго, душе моя, восхождения; дети, яко основания, степени, яко восхождения, премудренно подложив.
Исава возненавиденнаго подражала еси, душе, отдала еси прелестнику твоему первыя доброты первенство, и отеческия молитвы отпала еси, и дважды поползнулася еси, окаянная, деянием и разумом; темже ныне покайся.
Едом Исав наречеся, крайняго ради женонеистовнаго смешения; невоздержанием бо присно разжигаем и сластьми оскверняем, Едом именовася, еже глаголется разжжение души любогреховныя.
Иова на гноищи слышавши, о душе моя, оправдавшагося, того мужеству не поревновала еси, твердаго не имела еси предложения во всех, яже веси, и имиже искусилася еси, но явилася еси нетерпелива.
Иже первее на престоле, наг ныне на гноище гноен, многий в чадех и славный, безчаден и бездомок напрасно; палату убо гноище и бисерие струпы вменяше.
Царским достоинством, венцем и багряницею одеян, многоименный человек и праведный, богатством кипя и стады, внезапу богатства, славы, царства обнищав, лишися.
Аще праведен бяше он и непорочен паче всех, и не убеже ловления льстиваго и сети; ты же грехолюбива сущи, окаянная душе, что сотвориши, аще чесому от недоведомых случится наити тебе?
Тело осквернися, дух окаляся, весь острупихся; но, яко врач, Христе, обоя покаянием моим уврачуй, омый, очисти, покажи, Спасе мой, паче снега чистейша.
Тело Твое и Кровь, Распинаемый, о всех положил еси, Слове: Тело убо, да мя обновиши; Кровь, да омыеши мя; дух же предал еси, да мя приведеши, Христе, Твоему Родителю.
Соделал еси спасение посреде земли, Щедре, да спасемся; волею на Древе распялся еси, Едем затворенный отверзеся, горняя и дольняя тварь, языцы вси спасени покланяются Тебе.
Да будет ми купель Кровь из ребр Твоих, вкупе и питие, источившее воду оставления, да обоюду очищаюся, помазуяся и пия; яко помазание и питие, Слове, животочная Твоя словеса.
Наг есмь чертога, наг есмь и брака, купно и вечери; светильник угасе, яко безъелейный, чертог заключися мне спящу, вечеря снедеся; аз же по руку и ногу связан, вон низвержен есмь.
Чашу Церковь стяжа, ребра Твоя живоносная, из нихже сугубыя нам источи токи оставления и разума, во образ древняго и новаго, двоих вкупе Заветов, Спасе наш.
Время живота моего мало, и исполнено болезней и лукавства; но в покаянии мя приими, и в разум призови, да не буду стяжание, ни брашно чуждему, Спасе, Сам мя ущедри.
Высокоглаголив ныне есмь, жесток же и сердцем вотще и всуе, да не с фарисеем осудиши мя; паче же мытарево смирение подаждь ми, Едине Щедре, Правосуде, и сему мя сочисли.
Согреших, досадив сосуду плоти моея, вем, Щедре; но в покаянии мя приими, и в разум призови, да не буду стяжание, ни брашно чуждему, Спасе, Сам мя ущедри.
Самоистукан бых, страстьми душу мою вредя, Щедре; но в покаянии мя приими, и в разум призови, да не буду стяжание, ни брашно чуждему, Спасе, Сам мя ущедри.
Не послушах гласа Твоего, преслушах Писание Твое, Законоположника; но в покаянии мя приими, и в разум призови, да не буду стяжание, ни брашно чуждему, Спасе, Сам мя ущедри.
Припев: Преподобная мати Марие, моли Бога о нас.
Безплотных жительство в плоти преходящи, благодать, преподобная, к Богу велию воистину прияла еси, верно о чтущих тя предстательствуй. Темже молим тя, от всяких напастей и нас молитвами твоими избави.
Припев: Преподобная мати Марие, моли Бога о нас.
Великих безместий во глубину низведшися, неодержима была еси; но востекла еси помыслом лучшим к крайней деянми яве добродетели преславно, ангельское естество, Марие, удививши.
Припев: Преподобне отче Андрее, моли Бога о нас.
Андрее, отеческая похвало, молитвами твоими не престай моляся, предстоя Троице Пребожественней, яко да избавимся мучения, любовию предстателя тя божественнаго, всеблаженне, призывающии, Криту удобрение.
Слава: Нераздельное существом, неслитное Лицы, богословлю Тя, Троическое Едино Божество, яко Единоцарственное и Сопрестольное; вопию Ти песнь великую, в Вышних трегубо песнословимую.
И ныне: И раждаеши, и девствуеши, и пребываеши обоюду естеством Дева; Рождейся обновляет законы естества, утроба же раждает нераждающая. Бог идеже хощет, побеждается естества чин: творит бо елика хощет.
Ирмос: От нощи утренююща, Человеколюбче, просвети, молюся, и настави и мене на повеления Твоя, и научи мя, Спасе, творити волю Твою (2).
В нощи житие мое преидох присно; тьма бо бысть и глубока мне мгла, нощь греха; но яко дне сына, Спасе, покажи мя.
Рувима подражая, окаянный аз, содеях беззаконный и законопреступный совет на Бога Вышняго, осквернив ложе мое, яко отчее он.
Исповедаюся Тебе, Христе Царю: согреших, согреших, яко прежде Иосифа братия продавшии, чистоты плод и целомудрия.
От сродников праведная душа связася, продася в работу сладкий, во образ Господень; ты же вся, душе, продалася еси злыми твоими.
Иосифа праведнаго и целомудреннаго ума подражай, окаянная и неискусная душе, и не оскверняйся безсловесными стремленьми, присно беззаконнующи.
Аще и в рове поживе иногда Иосиф, Владыко Господи, но во образ погребения и востания Твоего; аз же что Тебе когда сицевое принесу?
Моисеов слышала еси ковчежец, душе, водами, волнами носим речными, яко в чертозе древле, бегающий дела горькаго совета фараонитска.
Аще бабы слышала еси, убивающая иногда безвозрастное мужеское, душе окаянная, целомудрия деяние; ныне, яко великий Моисей, сси премудрость.
Яко Моисей великий египтянина ума уязвивши, окаянная, не убила еси, душе; и како вселишися, глаголи, в пустыню страстей покаянием?
В пустыню вселися великий Моисей; гряди убо, подражай того житие, да и в купине Богоявления, душе, в видении будеши.
Моисеов жезл воображай, душе, ударяющий море и огустевающий глубину, во образ Креста Божественнаго, имже можеши и ты великая совершити.
Аарон приношаше огнь Богу непорочный, нелестный; но Офни и Финеес, яко ты, душе, приношаху чуждее Богу, оскверненное житие.
Яко тяжкий нравом фараону горькому бых, Владыко, Ианни и Иамври душею и телом, и погружен умом, но помози ми.
Калом смесихся окаянный умом, омый мя, Владыко, банею моих слез, молю Тя, плоти моея одежду убелив, яко снег.
Аще испытаю моя дела, Спасе, всякаго человека превозшедша грехами себе зрю, яко разумом мудрствуяй согреших, не неведением.
Пощади, пощади, Господи, создание Твое, согреших, ослаби ми, яко естеством чистый Сам сый Един, и ин разве Тебе никтоже есть кроме скверны.
Мене ради Бог сый, вообразился еси в мя, показал еси чудеса, исцелив прокаженныя, и разслабленнаго стягнув, кровоточивыя ток уставил еси, Спасе, прикосновением риз.
Кровоточивую подражай, окаянная душе, притецы, удержи ометы Христовы, да избавишися ран и услышиши от Него: вера твоя спасе тя.
Низу сничащую подражай, о душе, прииди, припади к ногама Иисусовыма, да тя исправит, и да ходиши право стези Господни.
Аще и кладязь еси глубокий, Владыко, источи ми воду из пречистых Твоих жил, да яко Самаряныня, не ктому пияй жажду, жизни бо струи источаеши.
Силоам да будут ми слезы моя, Владыко Господи, да умыю и аз зеницы сердца, и вижду Тя умно, Света Превечна.
Припев: Преподобная мати Марие, моли Бога о нас.
Несравненным желанием всебогатая, Древу возжелевши поклонитися животному, сподобилася еси желания; сподоби убо и мене улучити вышния славы.
Припев: Преподобная мати Марие, моли Бога о нас.
Струи Иорданския прешедши, обрела еси покой безболезненный, плоти сласти избежавши; еяже и нас изми твоими молитвами, преподобная.
Припев: Преподобне отче Андрее, моли Бога о нас.
Яко пастырей изряднейша, Андрее премудре, избранна суща тя, любовию велиею и страхом молю, твоими молитвами спасение улучити и жизнь вечную.
Слава: Тя, Троице, славим Единаго Бога: Свят, Свят, Свят еси, Отче, Сыне и Душе, простое Существо, Единице присно покланяемая.
И ныне: Из Тебе облечеся в мое смешение, нетленная, безмужная Мати Дево, Бог создавый веки, и соедини Себе человеческое естество.
Ирмос: Возопих всем сердцем моим к щедрому Богу, и услыша мя от ада преисподняго, и возведе от тли живот мой (2).
Слезы, Спасе, очию моею и из глубины воздыхания чисте приношу, вопиющу сердцу: Боже, согреших Ти, очисти мя.
Уклонилася еси, душе, от Господа твоего, якоже Дафан и Авирон; но пощади, воззови из ада преисподняго, да не пропасть земная тебе покрыет.
Яко юница, душе, разсвирепевшая, уподобилася еси Ефрему; яко серна от тенет сохрани житие, вперивши деянием ум, и зрением.
Рука нас Моисеева да уверит, душе, како может Бог прокаженное житие убелити и очистити, и не отчайся сама себе, аще и прокаженна еси.
Волны, Спасе, прегрешений моих, яко в мори Чермнем возвращающеся покрыша мя внезапу, яко египтяны иногда, и тристаты.
Неразумное, душе, произволение имела еси, яко прежде Израиль: божественныя бо манны предсудила еси безсловесно любосластное страстей объядение.
Кладенцы, душе, предпочла еси хананейских мыслей паче жилы камене, из негоже премудрости река, яко чаша, проливает токи богословия.
Свиная мяса и котлы, и египетскую пищу паче небесныя предсудила еси, душе моя, якоже древле неразумнии людие в пустыни.
Яко удари Моисей, раб Твой, жезлом камень, образно животворивая ребра Твоя прообразоваше, из нихже вси питие жизни, Спасе, почерпаем.
Испытай, душе, и смотряй, якоже Иисус Навин, обетования землю, какова есть, и вселися в ню благозаконием.
Востани и побори, яко Иисус Амалика, плотския страсти, и гаваониты, лестныя помыслы присно побеждающи.
Преиди времене текущее естество, яко прежде ковчег, и земли оныя буди во одержании обетования, душе, Бог повелевает.
Яко спасл еси Петра, возопивша: спаси, предварив мя, Спасе, от зверя мя избави, простер Твою руку, и возведи из глубины греховныя.
Пристанище Тя вем утишное, Владыко, Владыко Христе; но от незаходимых глубин греха и отчаяния мя, предварив, избави.
Аз есмь, Спасе, юже погубил еси древле царскую драхму, но вжег светильник Предтечу Твоего, Слове, взыщи и обрящи Твой образ.
Припев: Преподобная мати Марие, моли Бога о нас.
Да страстей пламень угасиши, слез капли источила еси присно, Марие, душею распаляема, ихже благодать подаждь и мне, твоему рабу.
Припев: Преподобная мати Марие, моли Бога о нас.
Безстрастие небесное стяжала еси крайним на земли житием, мати; темже тебе поющим страстей избавитися молитвами твоими молися.
Припев: Преподобне отче Андрее, моли Бога о нас.
Критскаго тя пастыря, и председателя, и вселенныя молитвенника ведый, притекаю, Андрее, и вопию ти: изми мя, отче, из глубины греха.
Слава: Троица есмь проста, нераздельна, раздельна Личне, и Единица есмь естеством соединена, Отец глаголет, и Сын, и Божественный Дух.
И ныне: Утроба Твоя Бога нам роди, воображенна по нам, Егоже, яко Создателя всех, моли, Богородице, да молитвами Твоими оправдимся.
Душе моя, душе моя, востани, что спиши? Конец приближается, и имаши смутитися; воспряни убо, да пощадит тя Христос Бог, везде сый, и вся исполняяй.
Христово врачевство видя отверсто и от сего Адаму истекающее здравие, пострада, уязвися диавол и, яко бедствуя, рыдаше и своим другом возопи: что сотворю Сыну Мариину, убивает мя Вифлеемлянин, Иже везде сый и вся исполняяй.
Припев: Во Царствии Твоем помяни нас, Господи.
Разбойника, Христе, рая жителя сотворил еси, на кресте Тебе возопивша: помяни мя; того покаянию сподоби и мене, недостойнаго.
Припев: Блажени нищии духом, яко тех есть Царство Небесное.
Маноя слышавши древле, душе моя, Бога в явлении бывша и из неплодове тогда приемша плод обетования, того благочестие подражай.
Припев: Блажени плачущии, яко тии утешатся.
Сампсоновой поревновавши лености, главу остригла еси, душе, дел твоих, предавши иноплеменником любосластием целомудренную жизнь и блаженную.
Припев: Блажени кротции, яко тии наследят землю.
Прежде челюстию ослею победивый иноплеменники, ныне пленение ласкосердству страстному обретеся; но избегни, душе моя, подражания, деяния и слабости.
Припев: Блажени алчущии и жаждущии правды, яко тии насытятся.
Варак и Иеффай военачальницы, судии Израилевы предпочтени быша, с нимиже Деворра мужеумная; тех доблестьми, душе, вмужившися, укрепися.
Припев: Блажени милостивии, яко тии помиловани будут.
Иаилино храбрство познала еси, душе моя, Сисара древле прободшую и спасение соделавшую древом острым, слышиши, имже тебе крест образуется.
Припев: Блажени чистии сердцем, яко тии Бога узрят.
Пожри, душе, жертву похвальную, деяние, яко дщерь, принеси от Иеффаевы чистейшую и заколи, яко жертву, страсти плотския Господеви твоему.
Припев: Блажени миротворцы, яко тии сынове Божии нарекутся.
Гедеоново руно помышляй, душе моя, с небесе росу подыми и приникни, якоже пес, и пий воду, от закона текущую, изгнетением писменным.
Припев: Блажени изгнани правды ради, яко тех есть Царство Небесное.
Илии священника осуждение, душе моя, восприяла еси, лишением ума приобретши страсти себе, якоже он чада, делати беззаконная.
Припев: Блажени есте, егда поносят вам, и изженут, и рекут всяк зол глагол на вы лжуще Мене ради.
В судиях левит небрежением свою жену дванадесятим коленом раздели, душе моя, да скверну обличит от Вениамина беззаконную.
Припев: Радуйтеся и веселитеся, яко мзда ваша многа на Небесех.
Любомудренная Анна молящися, устне убо двизаше ко хвалению, глас же ея не слышашеся, но обаче неплодна сущи, сына молитвы раждает достойна.
Припев: Помяни нас, Господи, егда приидеши во Царствии Твоем.
В судиях спричтеся Аннино порождение, великий Самуил, егоже воспитала Армафема в дому Господни; тому поревнуй, душе моя, и суди прежде инех дела твоя.
Припев: Помяни нас, Владыко, егда приидеши во Царствии Твоем.
Давид на царство избран, царски помазася рогом Божественнаго мира; ты убо, душе моя, аще хощеши вышняго Царствия, миром помажися слезами.
Припев: Помяни нас, Святый, егда приидеши во Царствии Твоем.
Помилуй создание Твое, Милостиве, ущедри руку Твоею творение и пощади вся согрешившия, и мене, паче всех Твоих презревшаго повелений.
Слава: Безначальну, и рождению же и происхождению, Отцу покланяюся рождшему, Сына славлю рожденнаго, пою сопросиявшаго Отцу же и Сыну Духа Святаго.
И ныне: Преестественному Рождеству Твоему покланяемся, по естеству славы Младенца Твоего не разделяюще, Богородительнице: Иже бо Един Лицем, сугубыми исповедуется естествы.
Ирмос: Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам; но не предаждь нас до конца, отцев Боже (2).
Согреших, беззаконновах и отвергох заповедь Твою, яко во гресех произведохся, и приложих язвам струпы себе; но Сам мя помилуй, яко Благоутробен, отцев Боже.
Тайная сердца моего исповедах Тебе, Судии моему, виждь мое смирение, виждь и скорбь мою, и вонми суду моему ныне, и Сам мя помилуй, яко Благоутробен, отцев Боже.
Саул иногда, яко погуби отца своего, душе, ослята, внезапу царство обрете к прослутию; но блюди, не забывай себе, скотския похоти твоя произволивши паче Царства Христова.
Давид иногда Богоотец, аще и согреши сугубо, душе моя, стрелою убо устрелен быв прелюбодейства, копием же пленен быв убийства томлением; но ты сама тяжчайшими делы недугуеши, самохотными стремленьми.
Совокупи убо Давид иногда беззаконию беззаконие: убийству же любодейство растворив, покаяние сугубое показа абие; но сама ты, лукавнейшая душе, соделала еси, не покаявшися Богу.
Давид иногда вообрази, списав яко на иконе песнь, еюже деяние обличает, еже содея, зовый: помилуй мя, Тебе бо единому согреших всех Богу, Сам очисти мя.
Кивот яко ношашеся на колеснице, Зан оный, егда превращшуся тельцу, точию коснуся, Божиим искусися гневом; но того дерзновения убежавши, душе, почитай божественная честне.
Слышала еси Авессалома, како на естество воста, познала еси того скверная деяния, имиже оскверни ложе Давида отца; но ты подражала еси того страстная и любосластная стремления.
Покорила еси неработное твое достоинство телу твоему, иного бо Ахитофела обретше врага, душе, снизшла еси сего советом; но сия разсыпа Сам Христос, да ты всяко спасешися.
Соломон чудный и благодати премудрости исполненный, сей лукавое иногда пред Богом сотворив, отступи от Него; емуже ты проклятым твоим житием, душе, уподобилася еси.
Сластьми влеком страстей своих оскверняшеся, увы мне, рачитель премудрости, рачитель блудных жен и странен от Бога; егоже ты подражала еси умом, о душе, сладострастьми скверными.
Ровоаму поревновала еси, не послушавшему совета отча, купно же и злейшему рабу Иеровоаму, прежнему отступнику, душе; но бегай подражания и зови Богу: согреших, ущедри мя.
Ахаавовым поревновала еси сквернам, душе моя, увы мне, была еси плотских скверн пребывалище, и сосуд срамлен страстей; но из глубины твоея воздохни и глаголи Богу грехи твоя.
Попали Илиа иногда дващи пятьдесят Иезавелиных, егда студныя пророки погуби, во обличение Ахаавово; но бегай подражания двою, душе, и укрепляйся.
Заключися тебе небо, душе, и глад Божий постиже тя, егда Илии Фесвитянина, якоже Ахаав, не покорися словесем иногда; но Сараффии уподобився, напитай пророчу душу.
Манассиева собрала еси согрешения изволением, поставльши яко мерзости страсти и умноживши, душе, негодования, но того покаянию ревнующи тепле, стяжи умиление.
Припадаю Ти и приношу Тебе, якоже слезы, глаголы моя: согреших, яко не согреши блудница, и беззаконновах, яко иный никтоже на земли; но ущедри, Владыко, творение Твое и воззови мя.
Погребох образ Твой, и растлих заповедь Твою, вся помрачися доброта, и страстьми угасися, Спасе, света; но ущедрив воздаждь ми, якоже поет Давид, радование.
Обратися, покайся, открый сокровенная, глаголи Богу вся ведущему: Ты веси моя тайная, Едине Спасе, но Сам мя помилуй, якоже поет Давид, по милости Твоей.
Исчезоша дние мои, яко соние востающаго, темже яко Езекия слезю на ложи моем, приложитися мне летом живота; но кий Исаия предстанет тебе, душе, аще не всех Бог?
Припев: Преподобная мати Марие, моли Бога о нас.
Возопивши к Пречистей Богоматери, первее отринула еси неистовство страстей, нужно стужающих, и посрамила еси врага запеншаго; но даждь ныне помощь от скорби и мне, рабу твоему.
Припев: Преподобная мати Марие, моли Бога о нас.
Егоже возлюбила еси, Егоже возжелала еси, Егоже ради плоть изнурила еси, преподобная, моли ныне Христа о рабех, яко да милостив быв всем нам, мирное состояние дарует почитающим Его.
Припев: Преподобне отче Андрее, моли Бога о нас.
На камени мя веры молитвами твоими утверди, отче, страхом мя Божественным ограждая, и покаяние, Андрее, подаждь ми, молюся ти, и избави мя от сети врагов, ищущих мя.
Слава: Троице простая, нераздельная, Единосущная, и Естество Едино, Светове и Свет, и Свята Три, и Едино Свято поется Бог Троица; но воспой, прослави Живот и Животы, душе, всех Бога.
И ныне: Поем Тя, благословим Тя, покланяемся Ти, Богородительнице, яко нераздельныя Троицы породила еси Единаго Христа Бога, и Сама отверзла еси нам, сущим на земли, небесная.
Ирмос: Безначальнаго Царя славы, Егоже трепещут Небесныя Силы, пойте, священницы, людие, превозносите во вся веки.
Припев: Святии апостоли, молите Бога о нас.
Яко углие невещественнаго огня, попалите вещественныя страсти моя, возжизающе ныне во мне желание Божественныя любве, апостоли.
Припев: Святии апостоли, молите Бога о нас.
Трубы благогласныя Слова почтим, имиже падоша стены неутверждены вражия и богоразумия утвердишася забрала.
Припев: Святии апостоли, молите Бога о нас.
Кумиры страстныя души моея сокрушите, иже храмы и столпы сокрушисте врага, апостоли Господни, храмове освященнии.
Припев: Пресвятая Богородице, спаси нас.
Вместила еси Невместимаго естеством, носила еси Носящаго вся, доила еси, Чистая, питающаго тварь Христа Жизнодавца.
Ирмос: Безначальнаго Царя славы, Егоже трепещут Небесныя Силы, пойте, священницы, людие, превозносите во вся веки.
Припев: Святии апостоли, молите Бога о нас.
Духа началохитростием создавше всю Церковь, апостоли Христовы, в ней благословите Христа во веки.
Припев: Святии апостоли, молите Бога о нас.
Вострубивше трубою учений, низвергоша апостоли всю лесть идольскую, Христа превозносяща во вся веки.
Припев: Святии апостоли, молите Бога о нас.
Апостоли, доброе преселение, назирателие мира и Небеснии жителие, вас присно восхваляющия избавите от бед.
Припев: Пресвятая Троице, Боже наш, слава Тебе.
Трисолнечное Всесветлое Богоначалие, Единославное и Единопрестольное естество, Отче Вседетелю, Сыне и Божественный Душе, пою Тя во веки.
Припев: Пресвятая Богородице, спаси нас.
Яко честный и превышший Престол, воспоим Божию Матерь непрестанно, людие, едину по рождестве Матерь и Деву.
Ирмос: Егоже воинства Небесная славят, и трепещут Херувими и Серафими, всяко дыхание и тварь, пойте, благословите и превозносите во вся веки (2).
Согрешивша, Спасе, помилуй, воздвигни мой ум ко обращению, приими мя кающагося, ущедри вопиюща: согреших Ти, спаси, беззаконновах, помилуй мя.
Колесничник Илиа колесницею добродетелей вшед, яко на небеса, ношашеся превыше иногда от земных; сего убо, душе моя, восход помышляй.
Иорданова струя первее милотию Илииною Елиссеем, ста сюду и сюду; ты же, о душе моя, сея не причастилася еси благодати за невоздержание.
Елиссей иногда прием милоть Илиину, прият сугубую благодать от Бога; ты же, о душе моя, сея не причастилася еси благодати за невоздержание.
Соманитида иногда праведнаго учреди, о душе, нравом благим; ты же не ввела еси в дом ни странна, ни путника, темже чертога изринешися вон, рыдающи.
Гиезиев подражала еси, окаянная, разум скверный всегда, душе, егоже сребролюбие отложи поне на старость; бегай геенскаго огня, отступивши злых твоих.
Ты Озии, душе, поревновавши, сего прокажение в себе стяжала еси сугубо, безместная бо мыслиши, беззаконная же дееши; остави, яже имаши, и притецы к покаянию.
Ниневитяны, душе, слышыла еси кающиеся Богу вретищем и пеплом; сих не подражала еси, но явилася еси злейшая всех, прежде закона и по законе прегрешивших.
В рове блата слышала еси Иеремию, душе, града Сионя рыданьми вопиюща и слез ищуща; подражай сего плачевное житее и спасешися.
Иона и Фарсис побеже, проразумев обращение ниневитянов, разуме бо, яко пророк, Божие благоутробие; темже ревноваше пророчеству не солгатися.
Даниила в рове слышала еси, како загради уста, о душе, зверей; уведела еси, како отроцы, иже о Азарии, погасиша верою пещи пламень горящий.
Ветхаго Завета вся приведох ти, душе, к подобию; подражай праведных боголюбивая деяния, избегни же паки лукавых грехов.
Правосуде Спасе, помилуй и избави мя огня и прещения, еже имам на суде праведно претерпети; ослаби ми прежде конца добродетелию и покаянием.
Яко разбойник вопию Ти: помяни мя; яко Петр плачу горце: ослаби ми, Спасе. Зову яко мытарь, слезю яко блудница: приими мое рыдание, якоже иногда Хананеино.
Гноение, Спасе, исцели смиренныя моея души, Едине Врачу, пластырь мне наложи, и елей и вино, дела покаяния, умиление со слезами.
Хананею и аз подражая, помилуй мя, вопию, Сыне Давидов; касаюся края ризы, яко кровоточивая; плачу, яко Марфа и Мариа над Лазарем.
Слезную, Спасе, сткляницу, яко миро истощавая на главу, зову Ти, якоже блудница, милости ищущая, мольбу приношу и оставление прошу прияти.
Аще и никтоже, якоже аз, согреши Тебе, но обаче приими и мене, Благоутробне Спасе, страхом кающася и любовию зовуща: согреших Тебе Единому, помилуй мя, Милостиве.
Пощади, Спасе, Твое создание, и взыщи яко Пастырь погибшее, предвари заблуждшаго, восхити от волка, сотвори мя овча на пастве Твоих овец.
Егда, Судие, сядеши яко Благоутробен, и покажеши страшную славу Твою, Спасе, о каковый страх тогда, пещи горящей, всем боящимся нестерпимаго судища Твоего.
Припев: Преподобная мати Марие, моли Бога о нас.
Света незаходимаго Мати тя просветивши, от омрачения страстей разреши; темже вшедши в духовную благодать, просвети, Марие, тя верно восхваляющия.
Припев: Преподобная мати Марие, моли Бога о нас.
Чудо ново видев, ужасашеся божественный в тебе воистину, мати, Зосима: ангела бо зряше во плоти, и ужасом весь исполняшеся, Христа поя во веки.
Припев: Преподобне отче Андрее, моли Бога о нас.
Яко дерзновение имый ко Господу, Андрее Критский, честная похвало, молю, молися разрешение от уз беззакония ныне обрести мне молитвами твоими, яко покаяния учитель и преподобных слава.
Припев: Благословим Отца, и Сына, и Святаго Духа, Господа.
Слава: Безначальне Отче, Сыне Собезначальне, Утешителю Благий, Душе Правый; Слова Божия Родителю, Отца Безначальна Слове, Душе Живый и Зиждяй, Троице Единице, помилуй мя.
И ныне: Яко от обращения червленицы, Пречистая, умная багряница Еммануилева, внутрь во чреве Твоем плоть исткася; темже Богородицу воистину Тя почитаем.
Припев: Хвалим, благословим, покланяемся Господеви, поюще и превозносяще во вся веки.
Ирмос: Егоже воинства Небесная славят, и трепещут Херувими и Серафимы, всяко дыхание и тварь, пойте, благословите и превозносите ко вся веки.
Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.
Припев: Святии апостоли, молите Бога о нас.
Источницы спасительныя воды явльшеся апостоли, истаявшую душу мою греховною жаждою оросите.
Припев: Святии апостоли, молите Бога о нас.
Плавающаго в пучине погибели и в погружении уже бывша Твоею десницею, якоже Петра, Господи, спаси мя.
Припев: Святии апостоли, молите Бога о нас.
Яко соли, вкусных суще учений, гнильство ума моего изсушите и неведения тьму отжените.
Припев: Пресвятая Богородице, спаси нас.
Радость яко родившая, плач мне подаждь, имже божественное утешение, Владычице, в будущем дни обрести возмогу.
Ирмос: Тя, Небесе и земли Ходатаицу вси роди ублажаем; плотски бо вселися в Тя исполнение, Дево, Божества.
Припев: Святии апостоли, молите Бога о нас.
Тя, благославное апостольское собрание, песньми величаем: вселенней бо светила светлая явистеся, прелесть отгоняще.
Припев: Святии апостоли, молите Бога о нас.
Благовестною мрежею вашею словесныя рыбы уловивше, сия приносите всегда снедь Христу, апостоли блаженнии.
Припев: Святии апостоли, молите Бога о нас.
К Богу вашим прошением помяните нас, апостоли, от всякаго избавитися искушения, молимся, любовию воспевающия вас.
Припев: Пресвятая Троице, Боже наш, слава Тебе.
Тя, Триипостасную Единицу, Отче, Сыне со Духом, Единаго Бога Единосущна пою, Троицу Единосильную и Безначальную.
Припев: Пресвятая Богородице, спаси нас.
Тя, Детородительницу и Деву, вси роди ублажаем, яко Тобою избавльшеся от клятвы: радость бо нам родила еси, Господа.
Ирмос: Безсеменнаго зачатия Рождество несказанное, Матере безмужныя нетленен Плод: Божие бо Рождение обновляет естества; темже Тя вси роди, яко Богоневестную Матерь, православно величаем (2).
Ум острупися, тело оболезнися, недугует дух, слово изнеможе, житие умертвися, конец при дверех; темже, моя окаянная душе, что сотвориши, егда приидет Судия испытати твоя.
Моисеово приведох ти, душе, миробытие, и от того все заветное Писание, поведающее тебе праведныя и неправедныя: от нихже вторыя, о душе, подражала еси, а не первыя, в Бога согрешивши.
Закон изнеможе, празднует Евангелие, Писание же все в тебе небрежено бысть, пророцы изнемогоша и все праведное слово; струпи твои, о душе, умножишася, не сущу врачу, исцеляющему тя.
Новаго привожду ти Писания указания, вводящая тя, душе, ко умилению: праведным убо поревнуй, грешных же отвращайся и умилостиви Христа молитвами же и пощеньми, и чистотою, и говением.
Христос вочеловечися, призвав к покаянию разбойники и блудницы; душе, покайся, дверь отверзеся Царствия уже, и предвосхищают е фарисее и мытари, и прелюбодеи кающиися.
Христос вочеловечися, плоти приобщився ми, и вся, елика суть естества хотением исполни, греха кроме, подобие тебе, о душе, и образ предпоказуя Своего снизхождения.
Христос волхвы спасе, пастыри созва, младенец множества показа мученики, старцы прослави и старыя вдовицы, ихже не поревновала еси, душе, ни деянием, ни житию; но горе тебе, внегда будеши судитися.
Постився Господь дний четыредесять в пустыни, последи взалка, показуя человеческое; душе, да не разленишися, аще тебе приложится враг, молитвою же и постом от ног твоих да отразится.
Христос искушашеся, диавол искушаше, показуя камение, да хлеби будут, на гору возведе видети вся царствия мира во мгновении; убойся, о душе, ловления, трезвися, молися на всякий час Богу.
Горлица пустыннолюбная, глас вопиющаго возгласи, Христов светильник, проповедуяй покаяние: Ирод беззаконнова со Иродиадою. Зри, душе моя, да не увязнеши в беззаконныя сети, но облобызай покаяние.
В пустыню вселися благодати Предтеча, и Иудея вся и Самария, слышавше, течаху и исповедаху грехи своя, крещающеся усердно; ихже ты не подражала еси, душе.
Брак убо честный и ложе нескверно: обоя бо Христос прежде благослови, плотию ядый и в Кане же на браце воду в вино совершая, и показуя первое чудо; да ты изменишися, о душе.
Разслабленнаго стягну Христос, одр вземша, и юношу умерша воздвиже, вдовиче рождение, и сотнича отрока, и Самаряныне явися, в дусе службу тебе, душе, предживописа.
Кровоточивую исцели прикосновением края ризна Господь, прокаженныя очисти, слепыя и хромыя просветив исправи, глухия же и немыя и ничащия низу исцели словом, да ты спасешися, окаянная душе.
Недуги исцеляя, нищим благовествоваше Христос Слово, вредныя уврачева, с мытари ядяше, со грешники беседоваше, Иаировы дщере душу предумершую возврати осязанием руки.
Мытарь спасашеся, и блудница целомудрствоваше, и фарисей, хваляся, осуждашеся: ов убо, очисти мя; ова же, помилуй мя; сей же величашеся вопия: Боже, благодарю Тя, и прочия безумныя глаголы.
Закхей мытарь бе, но обаче спасашеся; и фарисей Симон соблажняшеся, и блудница приимаше оставительная разрешения от Имущаго крепость оставляти грехи; юже, душе, потщися подражати.
Блуднице, о окаянная душе моя, не поревновала еси, яже приимши мира алавастр, со слезами мазаше нозе Спасове, отре же власы, древних согрешений рукописание раздирающаго ея.
Грады, имже даде Христос благовестие, душе моя, уведала еси, како прокляти быша; убойся указания, да не будеши якоже оны, ихже содомляном Владыка уподобив, даже до ада осуди.
Да не горшая, о душе моя, явишися отчаянием, Хананеи веру слышавшая, еяже дщи словом Божиим исцелися: Сыне Давидов, спаси и мене, воззови из глубины сердца, якоже она Христу.
Умилосердися, спаси мя, Сыне Давидов, помилуй, беснующияся словом исцеливый, глас же благоутробный, яко разбойнику, мне рцы: аминь глаголю тебе, со Мною будеши в раи, егда прииду во славе Моей.
Разбойник оглаголоваше Тя, разбойник богословяше Тя, оба бо на кресте свисяста; но, о Благоутробне, яко верному разбойнику Твоему, познавшему Тя Бога, и мне отверзи дверь славнаго Царствия Твоего.
Тварь содрогашеся распинаема Тя видящи, горы и камения страхом распадахуся, и земля сотрясашеся, и ад обнажашеся, и соомрачашеся свет во дни, зря Тебе, Иисусе, пригвождена ко Кресту.
Достойных покаяния плодов не истяжи от мене, ибо крепость моя во мне оскуде; сердце мне даруй присно сокрушенное, нищету же духовную, да сия Тебе принесу, яко приятную жертву, Едине Спасе.
Судие мой и Ведче мой, хотяй паки приити со ангелы судити миру всему, милостивным Твоим оком тогда видев мя пощади и ущедри мя, Иисусе, паче всякаго естества человеча согрешивша.
Припев: Преподобная мати Марие, моли Бога о нас.
Удивила еси всех странным житием твоим, ангелов чины и человеков соборы, невещественно поживши, и естество прешедши, имже яко невещественныма ногама вшедши, Марие, Иордан прешла еси.
Припев: Преподобная мати Марие, моли Бога о нас.
Умилостиви Создателя о хвалящих тя, преподобная мати, избавитися озлоблений и скорбей, окрест нападающих; да избавившеся от напастей, возвеличим непрестанно прославльшаго тя Господа.
Припев: Преподобне отче Андрее, моли Бога о нас.
Андрее честный и отче треблаженнейший, пастырю Критский, не престай моляся о воспевающих тя; да избавимся вси гнева, и скорби, и тления, и прегрешений безмерных, чтущии твою память верно.
Слава: Троице Единосущная, Единице Триипостасная, Тя воспеваем, Отца славяще, Сына величающе и Духу покланяющеся, Единому естеству воистину Богу, Жизни же и живущему Царству безконечному.
И ныне: Град Твой сохраняй, Богородительнице Пречистая; в Тебе бо сей верно царствуяй, в Тебе и утверждается, и Тобою побеждаяй, побеждает всякое искушение, и пленяет ратники, и проходит послушание.
Ирмос: Безсеменнаго зачатия Рождество несказанное, Матере безмужныя нетленен Плод: Божие бо Рождение обновляет естества; темже Тя вси роди, яко Богоневестную Матерь, православно величаем.
]]>